Տպել
Օրական կարելի է 50-150 գրամ միս ուտել, կարծում է սննդաբան Անդրեյ Բոբրովսկին (Ռուսաստան)։
Միսը պարունակում է կենդանական ծագման սպիտակուցներ, որոնք մարդու օրգանիզմի համար անփոխարինելի ամինաթթուների արժեքավոր աղբյուր են։ Սակայն այս մթերքը մեծ քանակությամբ օգտագործելու կարիք չկա՝ մասնագետի կարծիքով՝ օրական 50-150 գրամ միսը բավական է։ Միեւնույն ժամանակ, ոչ բոլոր մսամթերքներն են հարմար ամենօրյա օգտագործման համար, քանի որ մսի որոշ տեսակներ մեծ քանակությամբ վնասակար ճարպեր են պարունակում։
«Մենք պետք է նվազեցնենք այն մսի քանակը, որում վատ ճարպերը շատ են: Որպես կանոն, դա կարմիր միսն է։ Խորհուրդ է տրվում այն ուտել շաբաթական մեկ անգամից ամիսը մեկ անգամ», – ասել է մասնագետը։
Դիետոլոգի խոսքով՝ կարմիր մսի չարաշահումը կարող է հանգեցնել վտանգավոր հիվանդությունների զարգացման ու կյանքի տեւողության կրճատման։
«Որքան շատ կարմիր միս լինի սննդակարգում, այնքան կարճ կլինի կյանքի տեւողությունը: Վատ ճարպերը կարող են աթերոսկլերոզ, ինսուլտ, ինֆարկտ առաջացնել, իսկ մսի մարսման ժամանակ առաջացած նյութերը թունավոր ազդեցություն են ունենում աղիների լորձաթաղանթի վրա, ինչը բարձրացնում է քաղցկեղային հիվանդությունների զարգացման հավանականությունը», – ասել է Բոբրովսկին։
Ըստ դիետոլոգի, թռչնամսով կամ երիտասարդ գառան մսով կերակրատեսակները ավելի անվտանգ են, քան կարմիր մսով ուտեստները:
«Երիտասարդ գառան մսի մեջ վատ ճարպերը քիչ են: Ավելի լավ է նախապատվությունը տալ ճարպերի ցածր պարունակությամբ մսատեսակներին եւ թռչնամսին», – ասել է Բոբրովսկին:
Նա հավելել է, որ 60 տարեկանից բարձր մարդկանց ցանկացած միս ամեն օր օգտագործելը խորհուրդ չի տրվում։ Նման մարդկանց համար ամինաթթուների լրացուցիչ աղբյուրներ կարող են լինել ձուկը, ծովամթերքը, սունկը եւ տոֆուն:
«Մի արտահայտություն կա՝ սունկը անտառային միս է։ Սնկերում պարունակվող ամինաթթուներն ավելի ամբողջական են, քան մյուս բուսական մթերքներում, բայց միսն իսկապես փոխարինել կարելի է միայն սնկի եւ սոյայի հիմքով տոֆու պանրի համադրման միջոցով: Սնկի եւ սոյայի համադրությունը կարող է երբեմն փոխարինել մսին: Արժե ուշադրություն դարձնել նաեւ ձկանն ու ծովամթերքին, որոնց սպիտակուցը գրեթե նույնն է, ինչ որ մսինը», – ասել է Բոբրովսկին։
