Ինչպե՞ս է ճարպը բարձրացնում հիվանդությունների հավանականությունը

Օրգանիզմում ի պատասխան որովայնում ճարպի քանակության ավելացման տեղի ունեցող փոփոխությունները մանրազնին ուսումնասիրվել են TwinsUK-ի հետազոտությունում, ինչը թույլ է տվել նորովի նայել մետաբոլիկ հիվանդությունների պատճառին։

Թագավորական համալսարանի դոկտորներ Ջորդանա Բելի եւ Քոլետ Քրիստիանսենի ղեկավարությամբ կատարված հետազոտությունում դիտարկվել է, թե ինչպես են էպիգենետիկ նշանները (այն ցուցիչները, թե ինչպես է մարդու օրգանիզմը կարդում ԴՆԹ-ն, որպեսզի ազդի գեների աշխատանքի վրա) ճարպային հյուսվածքում փոփոխվում՝ որովայնում ճարպի կուտակմանը զուգընթաց։

Հետազոտության արդյունքները հրապարակվել են Genome Medicine ամսագրում։

Օգտագործելով 538 մարդու նմուշները եւ միացնելով տվյալները գենետիկայի, գեների ֆունկցիայի, դիետայի եւ առողջության մասին, հետազոտողներն ուսումնասիրել են ողջ գենոմի էպիգենետիկ նշանները (մարդու գենետիկ նյութի ամբողջությունը) եւ հայտնաբերել ինը գեն, որոնք մեծ նշանակություն ունեն մետաբոլիկ հիվանդությունների ռիսկի համար։

Դրանց մեջ էր այն գենը, որտեղ պարզված էպիգենետիկ փոփոխությունները ճանաչվել են պոտենցիալ մեխանիզմ, որի օգնությամբ դիետան կարող է ազդել որովայնի ճարպի կուտակման վրա, ինչպես նաեւ այլ էպիգենետիկ նշաններ, որոնք ցուցադրում են  գենետիկ ռիսկի ազդեցությունը գեների ֆունկցիայի եւ ինսուլինի հանդեպ ռեզիստենտության վրա։

Ստացված տվյալները հետազոտողներին նաեւ թույլ են տվել բնութագրել մոլեկուլյար փոփոխությունները, որոնք տեղի են ունենում որովայնում ճարպի քանակի ավելացման պատճառով, եւ այդ մեխանիզմների ազդեցությունը գեների ֆունկցիայի եւ ինսուլինի հանդեպ ռեզիստենտության վրա։

Մետաբոլիկ հիվանդությունները, որոնցից ամենատարածվածը դիաբետն է, խախտում են նորմալ նյութափոխանակությունը կամ սննդի վերածումն էներգիայի՝ բջջային մակարդակում։