Տպել
Սեզոնային ալերգիան, սովորաբար, մարդկանց մոտ ասոցացվում է փռշտոցի հետ, սակայն փռշտոցը ալերգիայի առաջին ախտանիշը չէ: Սեզոնային ալերգիայի ախտանիշներն են քթահոսությունը, քթի փակվածությունը և քթի խոռոչում, ականջներում, կոկորդում քորը: Այս մասին NEWS.am Medicine-ի հետ զրույցում ասաց Առողջապահության նախարարության ալերգոլոգիայի և իմունոլոգիայի գծով խորհրդատու Սևան Իրիցյանը:
Սեզոնային ալերգիան և հարբուխը
Գարունը սեզոնային ալերգիայի սրացումների շրջան է: Հարբուխի և սեզոնային ալերգիայի ախտանիշները բավական նման են իրար, ինչը հաճախ շփոթություն է առաջացնում մարդկանց մոտ: Սևան Իրիցյանի խոսքով, հարկավոր է օրինաչափություններ գտնել՝ ե՞րբ և ի՞նչ հանգամանքներում են առաջանում ախտանիշները:
«Հարբուխի պարագայում, օրվա ժամը, գտնվելու վայրը առանձնապես նշանակություն չունեն: Բացի այդ, հարբուխի հետ լինում են նաև այլ գանգատներ. թուլություն, ցավեր, ջերմություն, ինչը տիպիկ չէ սեզոնային ալերգիաներին: Տարբերվում է նաև ախտանիշների տևողությունը, հարբուխը սովորաբար մեկ շաբաթ է տևում և անցնում, կամ բարդանում և մեկ այլ խնդիր է դառնում, որն արդեն նկատելի կտարբերվի իր ախտանիշներով: Իսկ սեզոնային ալերգիաների դեպքում կարող է միայն ախտանիշների սրման աստիճանը փոխվել»,-ասաց է ալերգոլոգը:
Ի՞նչ անել
Սևան Իրիցյանի խոսքով, սեզոնային ալերգիաները վերջնականապես չեն բուժվում, ալերգիկները ստիպված են շարունակ հաբեր ընդունել, որոնք ժամանակավորապես կանխում են ախտանիշների առաջացումը: Տարիների ընթացքում օրգանիզմը ինքնուրույն կարգավորվում է, կամ հակառակը՝ ալերգիան բարդանում է և այլ հիվանդության վերածվում:
Ալերգոլոգը խորհուրդ է տալիս ախտանիշների առկայության դեպքում դիմել բժշկի և նրա կողմից նշանակված հաբերը ընդունել, ինչը հնարավորություն կտա որոշ ժամանակով ազատվել ախտանիշներից և հանգիստ դուրս գալ տնից:
Սնունդը և սեզոնային ալերգիան
Բժշկի խոսքով, սնունդը որևէ կերպ չի կարող ազդել ալերգիայի սրման վրա, սակայն նա ամեն դեպքում, խորհուրդ է տալիս խուսափել այն պտուղների օգտագործումից, որոնց ծաղկափոշին ալերգիայի առաջացման պատճառն է:
«Եթե մարդն ունի այդ ծաղկափոշու պատճառով առաջացող սեզոնային ալերգիա, ապա այդ և դրա նման այլ պտուղները ուտելու դեպքում, բերանի շրջանում մարդիկ ունենում են տարօրինակ զգացողություններ, ծակծկոցներ, կարող է նաև այտուց առաջանալ: Սա սեզոնային ալերգիան սննդի հետ կապող միակ օղակն է: Այսինքն ինչ-որ սնունդից հրաժարվելը չի կարող կանխարգելել սեզոնային ալերգիայի առաջացումը, միայն կարող է օգնել խուսափել այլ խնդիրներից»,-ասում է ալերգոլոգը:
