Տպել
Սաուդյան Արաբիայի և Թուրքիայի հետ դիվանագիտական հարաբերությունների բացակայությունը չի խանգարում, որ այդ երկրների քաղաքացիներն այցելեն Հայաստան։ Sputnik Արմենիային տված հարցազրույցում այս մասին ասաց Զբոսաշրջության պետական կոմիտեի նախագահի առաջին տեղակալ Մեխակ Ապրեսյանը։
Այդ զբոսաշրջիկները Հայաստան են ժամանում Ռուսաստանով և Վրաստանով։ Ապրեսյանի խոսքով` հայ ժողովուրդը միշտ աչքի է ընկել այլ երկրների հյուրերի նկատմամբ հատուկ վերաբերմունքով, ինչն էլ նրանց «մագնիսի» պես ձգում է Հայաստան։
«Մենք զբոսաշրջիկներ և հյուրեր ունենք Սաուդյան Արաբիայից, Թուրքիայից և ուրիշ երկրներից։ Մեզ համար հյուրը հյուր է` անկախ ազգությունից, ռասայից, կրոնական համոզմունքներից։ Մենք բոլորին սպասում ենք, բոլորին ասում ենք` բարի գալուստ Հայաստան», — նշեց նա։
Այդ առումով Ապրեսյանը հիշեցրեց, որ վերջերս Երևանն ընդգրկվել է ԱՊՀ երկրների մայրաքաղաքների` ռուսաստանցիների համար ամենահետաքրքիր քաղաքների վարկանիշում (տվյալները հավաքել է Tvil.ru ռուսական ծառայությունը` խմբ.)։ Նրա խոսքով` դրա համար օբյեկտիվ պատճառներ կան։
«Ես վստահ եմ, որ բոլորը Հայաստանում իրենց լավ են զգում, ասես իրենց տանը լինեն։ Նրանք հետո իրենց ընկերներին և հարազատներին են փոխանցում այն ջերմությունը, որն այստեղ զգացել են», — ասաց Sputnik Արմենիայի զրուցակիցը։
Նրա խոսքով, ծառայությունների որակը, հսկայական ներուժը, մշակութային ժառանգությունը, բնությունը, խոհանոցը. այս ամենը նպաստում են, որ Հայաստանը տարեցտարի ավելի գրավիչ դառնա զբոսաշրջիկների համար։
Ապրեսյանն ավելացրեց, որ Հայաստանում ծառայությունների ոլորտի աշխատողները (մատուցողները, հյուրանոցների անձնակազմը և այլն) մշտապես աշխատում են իրենց վրա, բարձրացնում մասնագիտական հմտությունները և նոր լեզուներ սովորում։
Հայաստանի անկախության հռչակումից հետո որոշ պետություններ չեն ճանաչել երկրի ինքնիշխանությունը։ Մասնավորապես, խոսքը վերաբերում է Պակիստանին և Սաուդյան Արաբիային։ Երկու իսլամական պետություններն էլ այդ քայլը բացատրում են արցախյան հակամարտության չկարգավորմամբ և այդ հարցում Ադրբեջանի հետ համերաշխությամբ։ Բայց ի տարբերություն Պակիստանի, Սաուդյան Արաբիայի դեպքում, չնայած դիվանագիտական հարաբերությունների բացակայությանը, կան կայուն շփումներ։
