Առաջնային իմունային անբավարարության իրազեկման շաբաթ Հայաստանում. առաջատար մասնագետները դասախոսություններ կկարդան (լուսանկարներ)
Advertisement 1000 x 90

Առաջնային իմունային անբավարարության իրազեկման շաբաթ Հայաստանում. առաջատար մասնագետները դասախոսություններ կկարդան

Հայաստանում անցկացվում է առաջնային իմունային անբավարարության իրազեկման շաբաթ, որի շրջանակում տեղի մասնագետները հնարավորություն ունեն ծանոթանալու միջազգային փորձին, միտումներին, հիվանդության հետ կապված իրենց հետաքրքրող հարցերին: Կազմակերպողներն են` Արաբկիր բժշկական համալիր-ԵԴԱԻ- ին, «Մոլեկուլային իմունոլոգիայի և ալերգոլոգիայի հայկական ասոցիացիա»-ն։

Ինչպես հետ զրույցում նշեց ալերգոլոգ, իմունոլոգ Սևան Իրիցյանը, կարիք կա ավելի ինտենսիվ արձագանքելու առաջնային իմունային անբավարարության խնդրին, բժշկական շրջանակի, հասարակության ուշադրությունը հրավիրելու դրա վրա, որն ամբողջ աշխարհում  նոր է ուսումնասիրվում:

«Նույնիսկ զարգացած երկրներում վերջին տասնամյակներում են այդ խնդրին ուշադրություն դարձրել: Շատերը կարծել են, որ դրանք խիստ հազվադեպ համարվող հիվանդություններ են, սակայն աշխարհի մի շարք երկրներում ինտենսիվ աշխատանքը թույլ տվեց հայտնաբերել ավելի մեծ թվով հիվանդների: Եթե տարիներ առաջ 100 հազարից մեկի մոտ էր խնդիրը հայտնաբերվում, ապա համապատասխան ուսումնասիրություններից հետո, պատկերը փոխվեց: Արդեն 100 հազարից 16-ի մոտ է այն հայտնաբերվում:  Ահա այդ արդյունքներն էլ առիթ դարձան, որ ավելի մեծ ուշադրություն դարձվի առաջնային իմունային անբավարարության խնդրին»,-ասաց Սևան Իրիցյանը: Նա նկատեց, որ հասարակությունը լավ տեղեկացված է ուռուցքային հիվանդություններից, սրտի անբավարարությունից: Այնինչ՝  առաջնային իմունային անբավարարության խնդրի մասին իրազեկվածությունը շատ ցածր է, այդ տեսանկյունից նույնիսկ անելիք կա բժիշկների շրջանում:

«Լսելով առաջնային իմունային անբավարարություն, շատերը պատկերացնում են, վատ իմունիտետ, սակայն խնդիրը շատ ավելի խորն է: Այն իմունային համակարգի որևէ օղակի խանգարումն է, որը կարող է հագեցնել մի շարք խնդիրների, այդ թվում կյանքի հետ անհամատեղելի վիճակների: Արդեն 400-ից ավելի հիվանդություններ կան, որոնք կապվում են առաջնային իմունային անբավարարության հետ, ու երևի շատերը կզարմանան, որ իմանան երևանյան հիվանդությունը ևս դրանց թվում է»,-ասաց նա:

Առաջնային իմունային անբավարարության իրազեկման շաբաթի շրջանակում Հայաստանում մասնագետների համար դասախոսություն կկարդա Թեհրանի բժշկական համալսարանի կլինիկական իմունոլոգիայի պրոֆեսոր, Իրանի իմունային անբավարարության գիտահետազոտական կենտրոնի նախագահ Նիմա Ռեզաեն: Նա առաջին անգամ չէ Հայաստանում: Նախորդ տարի արդեն հնարավորություն ունեցել է դասախոսություն կարդալու տեղի մասնագետների համար:

« Մի քանի օր այստեղ եմ հայաստանյան մասնագետներին ներկայացնելու առաջնային իմունային անբավարարության հետ կապված միջազգային միտումները, ախտորոշման, բուժման փորձը: Ընդհանրապես ներկայացնելու, թե ինչ է այն իրենից ենթադրում, ինչ ախտանիշներ ունի, ինչի վրա պետք է ուշադրություն դարձնել: Դասախոսության շեշտը դրվելու է հիվանդությունների կլինիկական դրսևորման վրա»,-ասաց պրոֆեսորը: Նա կարևորեց այս հարցում, թե բժիշկների, թե հասարակության լայն շերտերի իրազեկվածության բարձրացումը, որովհետև միայն այդ դեպքում թիրախային աշխատանք կտարվի:

«Օրինակ, մենք ունենում ենք երեխաներ, որոնք ինֆեկցիաներ են տանում, և այն տարվա ընթացքում մի քանի անգամ կրկնվում է: Ասենք միջին ականջի բորբոքում տարեկան երեք անգամ, հաճախակի թոքաբորբ և այլն: Երբ դրանք արտասովոր դժվար են ենթարկվում բուժման, այդ դեպքում անհրաժեշտություն կա դիմելու նեղ մասնագետների՝ հասկանալու առաջնային իմունային անբավարարության խնդիր է, թե ոչ: Ահա ճիշտ ախտորոշման պարագայում նպատակային բուժում կիրականացվի, ինչն էլ կնպաստի մարդու կյանքի որակի բարձրացմանը»,-նշեց Նիմա Ռեզաեն:

Ինչ վերաբերում է ախտորոշման հնարավորություններին, ապա Սևան Իրիցյանը նշեց, որ տեխնիկական առումով, ընդհանուր առմամբ, Հայաստանում մեծ խնդիրներ չկան: Պարզապես անհրաժեշտ է հիվանդության մասին տեղեկացվածությունը բարձր մակարդակի հասցնել: Անդրադառնալով Հայաստանում առաջնային իմունային անբավարարության հիվանդացության միտումներին, ապա մասնագետը նշեց, որ, ցավոք, հստակ վիճակագրություն չկա: Լիարժեք պատկեր ունենալու համար անհրաժեշտ է ստեղծել հիվանդությունների ռեգիստր: