Տպել
Քաղցր ուտելիքները բնավ չեն օգնում դեպրեսիայի ժամանակ, ընդհակառակը, ավելի են սրում այն, պարզել են Կանզասի համալսարանի մասնագետները։
Ինչպես նշում է «Ռոսիյսկայա գազետա»-ն, ձմռանը դեպրեսիայի խնդիրը առանձնապես սուր է դրվում. հաճախ դրա պատճառ է դառնում արևի լույսի պակասը։ Բայց սեզոնային դեպրեսիա ունեցող մարդկանց գիտնականները խորհուրդ են տալիս խուսափել քաղցր ուտելիքների առատությունից. դա թույլ կտա նվազեցնել դեպրեսիայի արտահայտվածությունը։
Շաքարի բարձր պարունակությամբ մթերքները առաջ են բերում մետաբոլիկ, բորբոքային և նեյրոկենսաբանական պրոցեսներ՝ կապված դեպրեսիայի հետ։ Գիտնականները նշում են, որ շաքարի բարձր սպառման, ավելի մութ օրերի և քնի ռեժիմի խախտումների համադրությունը՝ կապված ձմռան հետ, խախտում է փսիխիկան ու նպաստում դեպրեսիվ վիճակի զարգացմանը։ Իսկ շաքարը տրամադրությունը միայն ժամանակավորապես է բարձրացնում, բայց հետո տրամադրությունն ընկնում է։ Բացի այդ, պետք է հիշել, որ շաքարը աղեհամակարգի միկրոֆլորան առողջության տեսակետից ավելի վատն է դարձնում. քաղցրեղենների առատության ֆոնին աճում է ախտածին միկրոօրգանիզմների քանակը, ինչը վնասակար է թե՛ հոգեվիճակի, թե՛ ֆիզիկական առողջության համար։
«Ձմեռային դեպրեսիայի ընդհանուր գծերից մեկը շաքարի անհաղթահարելի պահանջն է։ Քաղցրեղենների մեծ քանակությունը կարող է առաջ բերել քիմիական ռեակցիաներ, որոնք ուղեղը բերում են տագնապի վիճակի, սթրեսի և դեպրեսիայի։ Այդ պրոցեսները հաճախ բորբոքային բնույթ ունեն։ Ի դեպ, զգույշ վերաբերվեք ալկոհոլին, որը շաքարի մեծ պարունակություն ունի։ Քաղցրեղենի փոխարեն նախընտրությունը տվեք մրգերին, բանջարեղեններին և այն մթերքներին, որոնք օմեգա-3 (կտավատի յուղ, ծովախեցգետիններ, ծովային ձուկ, ձկան յուղ) են պարունակում»,- ասում են գիտնականները։
