Տպել
Նավթի խոշորագույն արտադրող երկրները կորցնում են արժութային պահուստները և ազդեցությունը միջազգային հարթակում, գրում է Financial Times-ը:
2016թ. վերջին պահուստները նվազել են մինչև վերջին 10 տարվա նվազագույն մակարդակ, և նրանց նվազումը կարող է շարունակվել նավթային շուկայի վերսկսվող թուլության ֆոնին:
Այսպես, նավթ արտահանող 13 խոշորագույն երկրների միջազգային պահուստները կազմում են 967 միլիարդ դոլար՝ նվազագույնը 2006 թվականից ի վեր: 2013թ. գագաթնակետին ցուցանիշը հավասարվել էր 1.26 տրլն դոլարի:
Առավել մեծ կորուստ է կրել Վենեսուելան, որը խորը տնտեսական և քաղաքական ճգնաժամի մեջ է: Նրա արժութային պահուստները փլուզվել են 90 տոկոսով՝ առավելագույն մակարդակի համեմատ:
Լիբիայում անկումը կազմել է 45 տոկոս, Ալժիրում՝ 41, Նիգերիայում՝ 38 տոկոս, Ռուսաստանում՝ 35, Անգոլայում՝ 30, Կատարում՝ 29, Ղազախստանում՝ 22 տոկոս:
Պարսից ծոցի պետությունները, ներառյալ Սաուդյան Արաբիան, ԱՄԷ-ն և Քուվեյթը, օգտագործել են ավելի քիչ արժութային պահուստներ՝ նավթի ցածր գների հետևանքների դեմ պայքարելու համար, քանի որ նրանց բյուջետային պակասուրդները քիչ են եղել, իսկ նավթագազային ոլորտից եկող կրճատումը որոշ առումով փոխհատուցվել է ներդրումային եկամուտներով:
