Տպել
Մարդիկ, որոնք դեռահաս տարիքում ճարպակալում են ունեցել, հասուն տարիքում 71 տոկոսով ավելի հաճախ են բախվում քաղցկեղին, քան նրանք, ում քաշը մշտապես նորմայի սահմաններում է եղել: Այս մասին հայտնում են Թել Ավիվի համալսարանի գիտնականները:
Նրանք այս թեմայով ամենախոշոր հետազոտությունն են անցկացրել, որը ցույց է տվել, որ դեռահաս տարիքում ճարպակալմամբ տառապած տղամարդիկ 71 տոկոսով ավելի հաճախ են հիվանդանում ուղիղ աղիի քաղցկեղով: Ինչ վերաբերում է կանանց, որոնք դեռահաս տարիքում ավելորդ քաշ են ունեցել, նրանց շրջանում չարորակ ուռուցքների առաջացման հավանականությունը գրեթե 2 անգամ մեծանում է: Դրանից բացի, ինչպես ցույց է տվել հետազոտությունը, ավելորդ քաշը աղիների քաղցկեղի հավանականությունը մեծացնում է տղամարդկանց դեպքում 53 տոկոսով, իսկ կանանց դեպքում՝ 54 տոկոսով:
Նախորդ հետազոտություններով նաև ենթադրում էին, որ ավելորդ քաշը քաղցկեղի հավանականությունը մեծացնում է բորբոքային պրոցեսների և իմունային համակարգի խանգարումների խթանման հաշվին, կամ հորմոնների վրա ներգործության պատճառով: Այժմ իսրայելցի գիտնականները վերլուծել են 16-ից մինչև 19 տարեկան ավելի քան մեկ միլիոն տղամարդկանց և 700 հազարից ավելի կանանց հիվանդությունների պատմությունները 1967-ից 2002 թվականների ժամանակահատվածում: Այս հետազոտության բոլոր մասնակիցները 17 տարեկան դառնալու պահին բժշկական զննում են անցել, իսկ հետո նրանց հետևել են մինչև 2012 թվականը: Հետազոտության արդյունքները միանշանակ ցույց են տվել, որ դեռահասային ճարպակալումը էապես մեծացնում է հասուն տարիքում ուռուցքների առաջացման հավանականությունը:
Նշենք, որ քաղցկեղը մանկական և դեռահաս տարիքում ճարպակալման ամենևին էլ միակ վտանգը չէ: Ուրիշ հետազոտողներ այն եզրակացության են եկել, որ ավելորդ քաշով տառապող երեխաները և դեռահասները մեծ տարիքում ավելի հաճախ են բախվում սիրտ-անոթային հիվանդություններին, իսկ նրանց կյանքի տևողությունը նվազել է նույնիսկ այն դեպքում, եթե նրանք դիետաների և ֆիզիկական ծանրաբեռնվածության օգնությամբ քաշը նորմային են վերադարձրել:
