Տպել
Հայաստանի դպրոցներն ուսումնական տարին սկսում են տարբեր հարցերով ու խնդիրներով։ Որոշ դպրոցներում ընդունելության հայտերը չափազանց շատ են, որոշ դպրոցներում էլ զանգը դասարան է հրավիրելու մեկ-երկու աշակերտի։ Դասագրքեր, համազգեստ, դպրոցների լիցենզիաներ. շատ բան պետք է արագացված տեմպով լուծել։
Անկախ ամեն ինչից, սեպտեմբերի մեկը միշտ ինչ-որ նոր բան է բերում իր հետ` կայացրած որոշումների արձագանքի ակնկալիք ու առկա խնդիրների հետ կապված որոշ մտահոգություն։ Սա կրթական ոլորտի յուրահատկությունն է. որքան էլ լուծես խնդիրները, հայտնվում են նորերը, և այսպես անվերջ։
Այս տարի նախարարը կոչ արեց երեխաներին դպրոցական համազգեստով չճնշել՝ սև ու սպիտակ հագուստը դպրոցականների համար պարտադիր չէ։ Միաժամանակ նա կոչ արեց երեխաներին չափազանց գույնզգույն հագուստով էլ չուղարկել դպրոց. շեղում է ուշադրությունը, հատկապես` փոքրերի։ Բայց փոքրերը կուզենան նմանվել այն երեխաներին, որոնք վառ ու, իրենց կարծիքով, գեղեցիկ են հագնված։
Նույնը վերաբերում է նաև հեռախոսներին։ Սովորական, կոճակով, էժան հեռախոսները, որոնք ափսոս չէ կորցնել, չեն շեղում ուսումնական գործընթացից ու ծառայում են հենց բուն նպատակին՝ կապ են ապահովում։ Բայց որոշ դպրոցականներ ժամանակակից սմարթֆոններ ունեն` զանազան գրավիչ ու հետաքրքիր ծրագրերով, որոնք շեղում են նրանց։ Ու հենց այդպիսի հեռախոսներն են խանգարում ուսմանը։
Սրանք ամենևին էլ ծնողների ու ուսուցիչների ամենաարդիական հոգսերը չեն։ Որոշ դպրոցներում սովորելու ցանկություն ունեցողների տեղատարափ է, իսկ որոշները դատարկ են (այդպիսի դպրոցները հիմնականում փոքր գյուղերում են)։ Երևանում կան այնպիսի դպրոցներ, որոնք ավանդաբար ավելի հեղինակավոր են համարվում, շատերը ձգտում են այնտեղ սովորել, ընդ որում՝ ոչ միայն համեմատաբար ավելի ուժեղ մանկավարժական կազմի համար, այլ տրանսպորտի հարմարավետության պատճառով։
Ամբողջությամբ՝ armeniasputnik.am
