Տպել
Որոշ մարդկանց մոտ մազերը ճերմակում են ծանր հիվանդությունների կամ քրոնիկական սթրեսի դեպքում: PLOS Biology ամսագրում հրապարակված նոր հետազոտությունը պարզաբանում է, թե ինչու է դա տեղի ունենում:
ԱՄՆ առողջապահության ազգային ինստիտուտների և Ալաբամայի համալսարանի գիտնականները մկների մասնակցությամբ հետազոտությամբ կապ են գտել մազերի գույնի և իմունային պատասխանի միջև: Երբ օրգանիզմը բախվում է վիրուսի կամ բակտերիաների հետ, ակտիվանում է բնածին իմունիտետը: Ախտածինների ներխուժման ժամանակ բջիջները սկսում են ինտերֆերոններ արտադրել՝ սպիտակուցներ, որոնք մեծացնում են գեների էքսպրեսիայի մակարդակը, որոնք խոչընդոտում են վիրուսների բազմացմանը, խթանում իմունային բջիջները և ուժեղացնում օրգանիզմի պաշտպանվածությունը:
Մասնագետները փոխկապվածություն են հայտնաբերել բնածին իմունիտետի, MITF տրանսկրիպցիոն գործոնի և ճերմակելու միջև:
MITF-ն առանցքային դեր է խաղում մելանոցիտների (մելանին պիգմենտն արտադրող բջիջներ) շատ ֆունկցիաների կարգավորման մեջ: Պարզվել է, որ MITF-ն նաև զսպում է ինտերֆերոնային պատասխանը: Փորձերը ցույց են տվել, որ եթե MITF-ն մելանոցիտների ցողունային բջիջներում կորցնում էր ինտերֆերոնային պատասխանի վերահսկողությունը, փորձակենդանիների մոտ ճերմակ մազեր էին հայտնվում: Բացի այդ՝ վաղ ճերմակելու նախահակվածություն ունեցող մկների մոտ բնածին իմունիտետի արհեստական ակտիվացման դեպքում ճերմակ մազերը ավելի էին շատանում:
