Տպել
Հարվածային հմտությունները, որոնք անհրաժեշտ են թմբուկին հարվածելու համար, կարող են օգնել աուտիզմով տառապող դեռահասների մոտ հաղորդակցության եւ կենտրոնանալու ունակությունների բարելավմանը, վկայում են նոր հետազոտության արդյունքները, որը հրապարակվել է Proceedings of the National Academy of Sciences ամսագրում:
Հետազոտության արդյունքները ստացվել են աուտիզմի սպեկտրի խանգարումներով 36 դեռահասների հետ աշխատանքի ընթացքում, որոնց միջին տարիքը 18 տարեկան էր:
Նրանք, ովքեր ընտրվել էին թմբուկ նվագել սովորելու համար, շաբաթական երկու 45 րոպեանոց սեանս էին ստանում ութ շաբաթվա ընթացքում: Մյուս խմբում հարվածային գործիքների վրա նվագել չէին սովորեցնում:
Նրանք բոլորը հետազոտությունից առաջ եւ հետո ուղեղի սկանավորում եւ նյարդահոգեբանական թեստավորում են անցել: Գնահատվել են նաեւ բոլորի մոտ աուտիզմի ախտանիշների ծանրությունը:
Հետազոտության ավարտին հարվածային գործիքների ուսուցիչները նշել են, որ այն մասնակիցները, ովքեր անցել են անցել են դասընթացը, սկսել են ավելի լավ տեսողական կոնկտակտ հաստատե, հնչեցնել իրեն կարիքները եւ կարգավորել հույզերը: Արդյունքում, ըստ մանկավարժների եւ դաստիարակների, մասնակիցների մոտ բարձրացել է ինքնագնահատականը եւ նվազել զայրույթի բռնկումների թիվը։
«Ծրագիրը, որը մշակվել էր յուրաքանչյուր դեռահասի շարժողական ակտիվությանը եւ համաժամանակեցման ճշգրտությանը հետեւելու համար, կայանում էր մի շարք կրկնվող ռիթմիկ պատկերների կատարման ուսուցման մեջ»,- նշել է հետազոտության գլխավոր հեղինակ, Լոնդոնի Թագավորական քոլեջի Հոգեբուժության, հոգեբանության եւ նյարդաբանության ինստիտուտի ասպիրանտ Մարի-Ստեֆանի Քահարթը:
Նա նշել է, որ աուտիզմը ցմահ զարգացող նյարդային խանգարում է, որը բնութագրվում է սոցիալական հաղորդակցության եւ փոխազդեցության դեֆիցիտով, ինչպես նաեւ մի շարք կրկնվող հետաքրքրություններով, գործողություններով եւ վարքագծով:
Այդ թերությունները հաճախ դրսեւորվում են ուշադրության հետ կապված խնդիրների եւ հիպերակտիվ վարքագծի տեսքով, սակայն հարվածային գործիքներ նվագելը «շարժումների պլանավորում եւ ճշգրիտ ժամանակացույց», ինչպես նաեւ կենտրոնացած ուշադրություն եւ արգելակման վերահսկում է պահանջում, բացատրել է հետազոտողը:
