Տպել
Օնկոգինեկոլոգները տարբեր ուռուցքներ են տեսնում և յուրաքանչյուրը նման չէ մյուսներին: Սակայն ձվարանի 60կգ-անոց ուռուցքը, որը վերջերս հեռացրել էին 38-ամյա կնոջ օրգանիզմից, ամենամեծն էր, որը երբևէ տեսել էր Դենբերի հիվանդանոցից (Քոնեքթիքութ նահանգ) գինեկոլոգիական ուռուցքաբանության ոլորտի մասնագետ Վահագն Անդիկյանը և նրա գործընկերները:
«Ամեն մի վիրաբույժի չի հաջողվում նման չափի ուռուցք տեսնել: Այս դեպքը շատ բացառիկ էր», – NEWS.am Medicine-ի հետ զրույցում ասել է Վահագն Անդիկյանը:
Բժշկի խոսքով՝ հիվանդը 2017-ի նոյեմբերի սկզբին սկսել էր նկատել, որ իր ոտքերը և որովայնը ուռում են: Ոռուցքը շատ արագ էր աճում՝ շաբաթական 5 կգ մեծանում էր և ընդամենը 2-3 ամսում այն անհավանական չափերի հասավ: Ուռուցքի պատճառով հիվանդը չէր կարողանում քայլել և ստիպված էր հաշմանդամի սայլակով տեղաշարժվել:
Սկզբում կինը դիմել էր թերապևտի, որը միանգամից նրան վիրաբույժ Անդիկյանի մոտ ուղարկեց՝ հայկական ծագումով վիրաբույժի, որը մասնագիտանում է հենց նման հիվանդների բուժման մեջ:
«Երբ նա եկավ մեզ մոտ, արդեն ծայրահեղ վիճակում էր, հազիվ էր շարժվում, հաշմանդամի սայլակում էր: Քանի որ ուռուցքն ամեն օր աճում էր, ժամանակը շատ քիչ էր. պետք էր շատ արագ վիրահատական ծրագիր կազմել. որոշել, թե ինչպես ենք հեռացնելու այդ ուռուցքը», – պատմել է բժիշկը:
Նա 20 մասնագետներից կազմված թիմ է հավաքել՝ վիրաբույժներից, անէսթեզիոլոգներից, բուժքույրերից և պաթոլոգոանատոմներից, քանի որ մեկ վիրահատության ժամանակ հարկավոր էր հեռացնել ուռուցքը, պարզել ինչպիսին է այն՝ բարորակ թե չարորակ, ինչպես նաև վերականգնել որովայնի պատը:
Վիրահատությունը մոտ 5 ժամ տևեց և չնայած ողջ բարդությանը, հաջող ընթացավ: Հիստոլոգիական հետազոտությունը ցույց տվեց, որ ուռուցքը բարորակ էր. դա ձվարանի մուցինոզ ցիստադենոմա էր: Մասնագետը բացատրել է, որ նման ուռուցքներն առաջանում են ձվարանի մակերևույթին և արտադրում են ժելատինանման հեղուկ, որը կուտակվում է այդ խոռոչում և ձվարանի կապսուլան մեծ չափերի է հասցնում, ինչպես և պատահել էր այս դեպքում:
Հետվիրահատական շրջանում կնոջ մոտ ճնշման հետ կապված խնդիրներ են առաջացել: Մասնագետը բացատրել է, որ ուռուցքը ճնշել է ստորին սիներակին և աորտային, ինչի պատճառով կնոջ մոտ նվազել է երեկային ետհոսքը և անոթների տոնուսի խնդիր էր սկսվել:
Մասնագետները նշանակել են դեղեր, որոնք բարձրացնում են անոթների տոնուսը և ճնշումը: 2-3 օր անց հիվանդի ճնշումը կարգավորվել է և միանգամից սկսել է կազդուրվել, սկսել է ինքուրույն ուտել, քայլել: Նա ստիպված էր նորից սովորել քայլել ֆիզիոթերապևտների միջոցով, քանի որ սայլակում անցկացված ժամանակահատվածում նրա մկանները ապաճել էին:
Վիրահատությունից 2 շաբաթ անց հիավնդին դուրս են գրել հիվանդանոցից, իսկ 4 շաբաթ անց նա նորից եկել է բժիշկ Անդիկյանի մոտ:
«Նա անճանաչելի էր. վիրահատությունից հետո 180 ֆունտ՝ ավելի քան 80 կգ էր կորցրել»:
Հետաքրքիր է, որ մասնագետները կարողացել են ոչ միայն փրկել կնոջ կյանքը, այլև պահպանել նրա վերարտադրողական օրգանները: Չնայած ուռուցքից վնասված ձախ ձվարանը ֆալոպյան փողի հետ հեռացրել են, աջ ձվարանը և արգանդը առողջ են մնացել և ցանկության դեպքում կինը կարող է երեխաներ ունենալ:
