Տպել
Վիրուսները կարող են գրիպի դեմ նորագույն դեղերի նկատմամբ կայուն դառնալ բուժումը սկսելուց ընդամենը մի քանի օր անց՝ պարզել են ճապոնացի գիտնականները: Հետազոտության արդյունքները հրապարակվել են Nature Microbiology-ում:
Բալոկսավիր–մարբոկսիլ դեղը վերջերս է հայտնվել, այն 2018 թվականին կիրառելու համար հավանության է արժանացել Ճապոնիայում և ԱՄՆ-ում: Ճապոնիայում 2018-2019 թվականներին գրիպի սեզոնի ժամանակ այդ դեղը զբաղեցրել է գրիպի դեմ դեղերի շուկայի 40%-ը:
Ավելի վաղ ևս հաղորդվել է, որ վիրուսները կարող են դրա նկատմամբ կայուն դառնալ: Սակայն ավելի վաղ գիտնականները համարել են, որ կայուն դարձած վիրուսներն ունեն ցածր կենսունակություն և վատ են փոխանցվում այլ մարդկանց: Նոր հետազոտությունը ցույց է տվել, որ դա այդպես չէ. մուտացված վիրուսները իրականում շատ կենսունակ են և կարող են վարակել այլ մարդկանց:
Գիտնականներն ուսումնասիրել են գրիպի վիրուսները 253 մարդու մոտ մինչ բուժումը և 38 մարդու մոտ բուժումից հետո: Դեղի նկատմամբ կայունությունը զարգացել է 9 պացիենտի մոտ, նրանցից 8-ը երեխաներ են եղել: Հետազոտության հեղինակները ենթադրում են, որ երեխաների օրգանիզմում վիրուսը կարող է ավելի շատ հակված լինել մուտացիաների:
«Նոր դեղն անվտանգ է, այն անցել է կլինիկական 3 փորձարկումներ, սակայն նույնիսկ հետազոտությունների ժամանակ վիրուսների կայունության զարգացում է նկատվել: Բալոկսավիրի նկատմամբ կայուն վիրուսները համեմատաբար ավելի հաճախ են հանդիպում երեխաների մոտ»,- ասել է հետազոտության հեղինակ, Տոկիոյի համալսարանի վիրուսագետ Մասակի Իմային:
